Úlpildegen Aq Maqta joldyń jıeginde ósken jabaıy Túıe Tikenge maqtanyp:

 - Sen menimen oınama! Bizdiń arǵy atalarymyz aspandaǵy Aqsha Bulttan taraǵan, - deıdi birde.

 - Bolsa bolar, - deıdi álgi áńgimeni estip qalǵan qyz qulaǵyndaǵy Sulý Syrǵa. – «Bizdiń arǵy atamyz qora tóbesine shanshýly qol oraqtaı ádemi aımen aǵaıyn» dep aıtyp otyyratyn meniń ájem. Nesi bar?! Tań qalatyn túgi de joq!

 

- Shynynda da tań qalatyn túgi de joq! – deıdi Syrǵanyń áńgimesin Doǵa odan ári ilip áketip. – Biz, mysaly, jazǵy jyly jańbyrdan soń jarq etip shyǵa keletin keremet Kempirqosaqpen jaqyn týys bolyp kelemiz!

 

Bulardyń paryqsyzdaý áńgimesin ári tyńdap, beri tyńdap, ábden yǵyr bolǵan Túıe Tiken:

 

- Aıtpaı-aq qoıaıyn dep edim, bolmadyńdar ǵoı! – dedi. – Báz de tegin sıyrdyń tezegi emespiz! Arǵy atamyz – aspannan aǵyp túsken jaryq juldyz eken. Gúl atqan kezde bizder sodan aýmaımyz. Múmkin bárimizdiń sózimizde de bir shyndyq bar shyǵar. Áıtse de óz basym túsinbeıtin bir nárse: ata-tegim aspan áleminiń turǵyndary bolsa, biz ózimiz naǵyp jer basyp júrmiz osy?!

 

(Qadyr Myrza Álı, «Ǵıbratnámá» kitabynan)